"Торгоны зам" раллид оролцож буй уралдаанчид Туркээс Монгол руу гарчээ

Б.Бадамзул

Чихэнд чимэгтэй

2024-08-13

“Зүүн, Барууны нөхөрлөл, Торгоны зам ралли" 18 дахь удаагийн уралдааныг Турк улс зохион байгуулж байна. Уралдааны оролцогчид энэ сарын 4-нд Истанбул хотын Султанахмэт талбайд цуглан замдаа гарчээ. Тэд Туркийн үзэсгэлэнт газруудаар дайрч Иран, Туркменистан, Казахстан, Хятад, Монгол гэсэн маршрутаар 15 мянган км замыг туулж наймдугаар сарын 28-нд Монголд барианд орно. Ингэхдээ юуны түрүүнд Анкара хот ороод дараа нь Нэвсэхир мужийн агаарын бөмбөлгөөрөө алдартай Каппадокиаг үзээд тэндээс Кахраманмараш муж, дараа нь Адияамэн орж ЮНЕСКО-гийн Дэлхийн соёлын өвийн жагсаалтад байдаг 2000 жилийн настай аварга хөшөөг үзэж 2206 метр өндөр Нэмрут ууланд авирчээ. Раллид Турк, Итали, Герман, Австри, Молдавын 28 жолооч 12 автомашинтай оролцож байна.