Боксын дэлхийн цомын тэмцээн Монголд болно

Н.Ариунсайхан

Чихэнд чимэгтэй

2024-07-22

Энэ оны гурав дахь удаагийн боксын дэлхийн цомын тэмцээн есдүгээр сарын 23-26-ны өдрүүдэд Улаанбаатар хотын "UG Arena" спорт цогцолборт болно. Дөрвөн өдөр үргэлжлэх тус тэмцээнийг Дэлхийн боксын холбоо Монголын боксын холбоотой хамтран Ази тивд анх удаа зохион байгуулах гэж буйгаараа онцлог. Цомын тэмцээн нь эрэгтэй, эмэгтэй шилдэг боксчид жилийн турш хэд хэдэн үе шаттайгаар өрсөлдөж чансааны оноо цуглуулдаг цуврал тэмцээн билээ. Ирэх тэмцээнд тамирчид эрэгтэй долоо, эмэгтэй зургаан жингийн ангилалд өрсөлдөж, ялсан нь энэ оны арваннэгдүгээр сарын сүүлчээр Английн Шеффилд хотноо болох боксын дэлхийн цомын аварга шалгаруулах тэмцээнд оролцох эрхээ авна.

Боксын цомын тэмцээнийг Монголд зохион байгуулах тухай Дэлхийн боксын холбооны ерөнхийлөгч Борис ван дер Ворст манай улсад айлчилж, Монголын боксын холбооныхонтой уулзах үеэрээ мэдэгдсэн байна. Тэрбээр “Бид Ази тивд анх удаагаа дэлхийн боксын цомын тэмцээнийг зохион байгуулж байгаадаа баяртай байна. Монголын боксын холбоо уг тэмцээнийг зохион байгуулах нэн хүсэл эрмэлзэлтэй, тууштай байсныг онцлох нь зүйтэй” гэжээ.