Украины Зэвсэгт хүчний ерөнхий командлагч CNN телевизэд дэлгэрэнгүй ярилцлага өгөв

Д.Бизьяа

Анд нөхдийн мэдээ

2024-09-06

   Украины Зэвсэгт хүчний ерөнхий командлагч Александр Сырский Оросын эх газар луу хийсэн дайралтынхаа зорилго, үндсэн шалтгааны талаар CNN телевизэд дэлгэрэнгүй тайлбарлаж, ажиллагаа амжилттай болсон гэж дүгнэжээ. Тэрбээр Курск рүү дайрсан тухайгаа "Дайсны нутаг дэвсгэрт нэвтэрч бидний өдөр тутам мэдэрдэг тэр хүнд бэрхийг өөрсдөд нь мэдрүүлэх зорилготой байсан" гэжээ. Мөн Оросын довтолгооны хүчин чадлыг бууруулах зорилгоо амжилттай биелүүлсэн болохоо онцолсон байна. Украины арми өнгөрсөн сарын эхээр Курск муж руу довтолж, зарим газрыг эзэлсэн нь хоёр жил, зургаан сарын турш үргэлжилсэн дайны явцыг өөрчилсөн юм. А.Сырский Оросын зүгээс ирж буй довтолгооны талаар "Сүүлийн зургаан өдрийн турш дайсан манай нутаг руу нэг ч алхам урагшлаагүй” гэжээ. Харин тэрбээр Оросын арми Украинаас хүн хүч, зэвсэг техникийн хувьд давуу гэдгийг хүлээн зөвшөөрч "Дайсан нисэх онгоц, пуужин, их буу, сум, цэрэг, танк, явган цэрэг гээд бүх талаараа манайхаас давуу. Тиймээс Украин улс илүү ухаалаг, илүү үр дүнтэй байлдах ёстой” хэмээн онцолсон байна. Уг ярилцлагыг CNN агентлагийн олон улсын сэтгүүлч Кристина Аманпур Украинд авсан байна. Нөгөө талаар ерөнхийлөгч В.Зеленский энэ сард АНУ-д айлчилж, НҮБ-ын Ерөнхий Ассамблейн чуулганд оролцож, АНУ-ын Ерөнхийлөгч Жо Байден болон ерөнхийлөгчийн сонгуульд нэр дэвшигчдэд “Украины дайнд ялалт байгуулах төлөвлөгөө”-г танилцуулахаар зэхэж байгаа ажээ.