Тайланд: 82 настай эмэгтэй интернэтээс сурсан мэдлэгээрээ хүний амь аврав

Д.Бизьяа

Анд нөхдийн мэдээ

2024-07-18

Цахилгаан төхөөрөмж засаж байгаад тогонд цохиулж ухаан алдсан засварчныг 82 настай эмэгтэй аварсан тухай Тайландын “Bangkok Post” сонин мэдээлэв. Болсон явдлын талаар тодруулбал, цахилгаанчин дуудлагаар айлд ирээд засвар хийхээр шатаар өгсөж байгаад цахилгааны утсанд хүрч тогонд цохиулснаас ухаан алджээ. Хяналтын камерын бичлэгээс харахад гэрийн эзэн 82 настай эмэгтэй тэр даруй засварчны хөлийн шагайгаар олсоор оосорлон татаж тогтой утаснаас холдуулсан байна. Хэрэв тэрбээр олсоор оосорлолгүй шууд гараараа татсан бол өөрөө мөн цахилгаанд цохиулах байв. Улмаар цахилгаанчинд хиймэл амьсгаа хийхэд удалгүй ухаан орж эмнэлэгт хүргэгджээ. Өндөр настан эмэгтэй цахилгаанд цохиулсан хүнд хэрхэн туслах тухай анхан шатны мэдлэгийг “YouTube”-ээс харж сурсан тухайгаа өгүүлсэн байна. Интернэтээс олж авсан мэдлэгээрээ хүний амь аварсан эмээг орон нутгийн хэвлэлүүд онцлон сайшааж байна.