Норвеги улс батлан хамгаалах зардлаа нэмэгдүүлнэ
Норвеги улс Оросын түрэлтээс сэргийлж 2036 он гэхэд батлан хамгаалах зардлаа 1.6 их наяд кроноор нэмэгдүүлэхээр төлөвлөж байгаагаа мэдэгдэв. Украины дайн үргэлжилж, АНУ-ын засгийн эрхэнд Дональд Трамп эргэн ирэх магадлал өндөрсөж байгаа энэ үед Европын орнууд зэвсэглэлээ нэмэгдүүлж эхэлж байгаа талаар шинжээчид мэдээлж байна. Ерөнхий сайд Йонас Гар Стёре ирэх 12 жилд батлан хамгаалах зардлаа 600 тэрбум кроноор нэмэгдүүлэхээр төлөвлөж байгаагаа "Түүхэн өсөлт" гэж нэрлээд, дор хаяж таван шинэ шумбагч онгоц худалдаж авах, Норвегийн түүхэнд анх удаа алсын тусгалын агаарын довтолгооноос хамгаалах систем барихаар төлөвлөж байгаагаа мэдэгджээ. Улмаар “Аюулгүй байдлын нөхцөл муудаж байгаа энэ үед бид зардлаа нэмэгдүүлж, батлан хамгаалах, бэлэн байдалд анхаарах шаардлагатай байна” гэсэн байна. Мөн "Норвеги улс хэнд ч аюул занал учруулахгүй. Гэхдээ бид хямрал, дайны үед өөрсдийгөө хамгаалах чадвартай байх ёстой" хэмээн онцолжээ. Төлөвлөгөө ёсоор тус улс хугацаат цэргийн албан хаагчдын тоог одоогийн 9000-аас 13500 болгон аажмаар нэмэгдүүлнэ гэнэ. Арваннэгдүгээр сард сонгуульд Д.Трамп ялж, АНУ-ын засгийн эрхэнд гарвал НАТО-гийн систем ганхаж магадгүй гэсэн болгоомжлол Европын орнуудын дунд нэмэгдсээр байна. Дани улс 2026 оноос эхлэн эмэгтэйчүүдийг цэрэгт татдаг болохоор төлөвлөж байгаагаа өнгөрсөн сард зарласан. Сайн дурын цэргийн тогтолцоотой Герман улс ч мөн цэрэг татлагыг сэргээх талаар хэлэлцэж байна.
ТӨСТЭЙ МЭДЭЭ
Жүжигчин Жерар Депардьед ял оноов
2025-05-14
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.