АНУ-ын цэрэг Шведэд байршина

Д.Бизьяа

Анд нөхдийн мэдээ

2023-12-08

   Украины дайны дараа НАТО-д элсэхийг эрмэлзэж буй Швед улс дотоодын цэргийн баазуудаа АНУ-д ашиглуулахыг зөвшөөрсөн гэрээнд гарын үсэг зурлаа. Тус хоёр улс дээрх агуулга бүхий батлан хамгаалах салбарын хамтын ажиллагааны гэрээнд гарын үсэг зурж баталгаажуулсан тухай “Times” сонин мэдээлжээ. Энэхүү гэрээ ёсоор АНУ-ын арми Швед улсын 17 цэргийн баазад цэргээ байршуулах бөгөөд АНУ-ын цэргийн машин техник, байлдааны хөлөг онгоц, нисэх онгоцууд тус улсад чөлөөтэй нэвтрэх боломжтой болсон байна. Шведийн Батлан ​​хамгаалахын сайд Пал Йонсон хэлэхдээ тус улс Дэлхийн хоёрдугаар дайнаас хойш аюулгүй байдлын хувьд хамгийн адармаатай орчинд ороод байгааг дурдаад "Энэхүү гэрээ нь Швед улс дайн, хямралын үед АНУ-аас дэмжлэг авах илүү сайн нөхцлийг бүрдүүлж байна" хэмээн онцолсон байна. Улмаар уг гэрээг "Түүхэн гэрээ" хэмээн онцлоод АНУ одоо НАТО-гийн шийдвэргүйгээр онцгой байдлын үед Шведтэй хамтран ажиллах боломжтой болсныг хэлжээ. Мөн АНУ-ын Төрийн департамент "Швед бол НАТО-гийн үнэт зүйлсийн төлөө тэмцэж буй хүчирхэг, чадварлаг түнш бөгөөд НАТО-д элссэнээр энэ холбоо улам хүчирхэг болно" гэж мэдэгдэв. Уламжлал ёсоор цэргийн эвсэлд үл нэгдэх бодлого баримталж ирсэн Швед улс өнгөрсөн онд ОХУ Украинд довтолсны дараа энэ бодлогоосоо татгалзаж, НАТО-д гишүүнээр элсэх хүсэлтээ гаргасан юм. Гэвч Турк, Унгар хоёрын эсэргүүцэлтэй тулгарснаар элсэх хугацаа хойшлогдоод байгаа билээ. Сөрөг хүчний Социал демократ намын гишүүн, Батлан ​​хамгаалахын сайд асан Питер Хултквист уг хэлэлцээрийг дэмжиж буйгаа илэрхийлж “Энэхүү гэрээ нь одоогийн бидний амьдарч буй аюулгүй байдлын орчинд маш чухал" гэжээ.