АНУ дахь монголчуудын гар бөмбөгийн тэмцээнд 600 гаруй хүн оролцжээ

Б.Бадамзул

Дэлхий дүүрэн монголчууд

2023-08-17

АНУ-д ажиллаж амьдарч буй иргэдийн 15 дахь удаагийн гар бөмбөгийн аварга шалгаруулах тэмцээнийг Вашингтон хот орчмын монголчуудын холбоо, гар бөмбөгийн клубууд хамтран тус хотын "St.James" цогцолборт наймдугаар сарын 12, 13-ны өдрүүдэд зохион байгууллаа. Тэмцээн дөчөөс дээш болон доош насны эрэгтэй, эмэгтэй ангиллаар болж 29 багийн 600 гаруй тамирчин оролцсон байна. Монголчууд Сан Франциско, Оклэнд, Дэнвер, Юта, Чикаго, Нью-Йорк хотоос ирж оролцсоноос гадна Киргиз, Буриадын баг анх удаагаа ирж өрсөлджээ. Ингээд эрэгтэйчүүдийн 40-өөс доош насны ангилалд Чикаго хотын монголчуудын баг түрүүлсэн бол киргизүүд удаалсан байна. Харин эмэгтэйчүүдийн 40-өөс доош насны ангилалд Сан Франциско хотын монголчууд түрүүлж, Вашингтон, Дэнвер хотын монголчууд удаалжээ. Мөн эрэгтэйчүүдийн 40-өөс дээш насны ангилалд “Монгол морьд”, “Chicago Govi Trans”, “USA Trans” багууд эхний гурван байрыг эзэлсэн бол эмэгтэйчүүдийн ангилалд “Fairfax”, “Oakland”, “DC Power” багууд шилдгээр шалгарсан байна.