НҮБ-ын цэргийн хүчний анхны монгол командлагч ажлаа авахаар Кипр улсыг зорилоо
Кипр улс дахь НҮБ-ын цэргийн хүчний командлагчийн албан тушаалд томилогдсон хошууч генерал Б.Эрдэнэбат үүрэгт ажлаа хүлээн авахаар өнгөрөгч бямба гарагт Кипр улсыг зорилоо. Тэрбээр өөрийн жолооч, эмч, туслахын хамтаар Улаанбаатараас морджээ. НҮБ Кипр улсад 1964 оноос хойш буюу 60 дахь жилдээ энхийг сахиулах ажиллагаа явуулж байгаа бөгөөд өмнөх командлагчийн үүрэг гүйцэтгэх хугацаа дууссанаар энэ албан тушаалд өнгөрсөн оны дундуур сонгон шалгаруулалт зарласан юм. Улмаар дэлхийн олон арван орноос нэр дэвшсэн дээд тушаалын офицеруудын дунд хэд хэдэн үе шаттай сонгон шалгаруулалт явуулсны эцэст Монголын Зэвсэгт хүчний Агаарын цэргийн штабын дарга, бригадын генерал Б.Эрдэнэбатыг сонгосон билээ. Өнгөрөгч нэгдүгээр сарын 4-нд энэ шийдвэрт НҮБ-ын Ерөнхий нарийн бичгийн дарга Антониу Гутерриш гарын үсэг зурж баталгаажуулснаар Монгол улсын Зэвсэгт хүчний энхийг сахиулах ажиллагааны 22 жилийн түүхэнд анх удаа монгол генерал НҮБ-ын цэргийн хүчний командлагчаар томилогдсон юм. Энхийг сахиулах ажиллагааны цэргийн хүчний командлагч нь хошууч генералын зэрэгтэй албан тушаал тул ерөнхийлөгч У.Хүрэлсүх Кипр улсад мордохынх нь өмнөхөн Б.Эрдэнэбатад хошууч генерал цол олгосон байна.
Хошууч генерал Б.Эрдэнэбат ажлаа Норвегийн Зэвсэгт хүчний хошууч генерал Ингрид Гьеэрдэгээс хүлээж авна. Түүний өмнө Австралийн генерал Шэрил Энн Пийрс энэ албыг хашиж байв. Кипр дахь ажиллагаа нь дэлхий дахинд НҮБ-ын явуулж буй 12 энхийг сахиулах ажиллагааны нэг юм. Өнөөдөр тус улсад Их Британи, Австри, Аргентин, Унгар зэрэг 10 орны 800 шахам цэргийн албан хаагч, офицер үүрэг гүйцэтгэж байна. 2023-2024 онд НҮБ уг ажиллагаанд 56.2 сая доллар зарцуулах бөгөөд жил бүрийн төсвийн 6.5 сая долларыг Кипр улс өөрөө гаргадаг байна.
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.