Өвөр монгол охины дэлхийд алдаршсан зургийн түүх
Өвөр монголчуудын нүүдэлчин амьдралын нэгээхэн хэсгийг харуулж, дэлхий дахины сая сая хүний нүдийг хужирлан хайрыг татсан энэ зургийг Хятадын гэрэл зурагчин Хан Чэнли авчээ. Өвөр Монголын тал нутгийн байгаль, хүмүүсийн амьдралыг гэрэл зурагт буулгах зорилготой аяллынхаа явцад тэрбээр Хөлөнбуйр нутгийн малчин айлд хэдэн өдрөөр саатаж, монголчуудын аж төрөл, ёс заншилтай сайтар танилцсан байна. “Тал нутгийн байгалийн үзэсгэлэн, монголчуудын найрсаг зочломтгой зан, амар амгалан амьдралыг биширсэн” хэмээн тэрбээр нэгэн ярилцлагадаа хэлжээ. Ийн саатаж байх хэд хоногтоо зурагчин тэндэх газрын мал, хүн хоёр хоорондоо зүрх сэтгэлийн ер бусын нандин холбоотой болохыг ажиглаж, үүнийг нь хальсанд буулгахыг зорин биелүүлсэн нь энэ зураг юм. Түүний хэлснээр энэ зурагт хүүхэд насны баяр баясгалан, хиргүй ариун сэтгэл, хязгааргүй эрх чөлөөгөөр дамжуулан хүн, байгалийн гүн гүнзгий холбоог харуулахыг зорьсон байна.
Хөлөнбуйрын малчин айлын охин Бүтэдмаа зураг авахуулах үедээ таван настай байжээ. Өвөр Монголын малчин монголчуудын амьдралыг дэлхийд таниулсан энэ зургийг Хан Чэнли 2003 онд авсан юм. Улмаар 11 жилийн дараа Хөлөнбуйрт дахин очиж 16 настай Бүтэдмааг аав, ээжтэй нь авсан зургийг энд мөн толилуулж байна. 1954 онд төрсөн, Хятадын гэрэл зурагчдын нийгэмлэгийн гишүүн Хан Чэнли Хөлөнбуйрт анх 1999 оны өвөл очжээ. Ингэхдээ Эвенкийн өөртөө засах хошуунд, тэр дундаа Хятадад буриад монголчуудын төвлөрөн суусан цорын ганц газар болох 6000 хүнтэй Шэнэхээн суманд зочилсон бөгөөд морь унан давхиж буй дөрвөн настай охиныг очсон өдрөө үзэж маш их гайхсанаа ярилцлагадаа дурдсан байна. Улмаар уг хошууны нутгаар 1000 гаруй километр аялсны зэрэгцээ хожим нь ч олон удаа ирж баялаг материал цуглуулсан нь Хятадын монголчууд, тэр дундаа малчин түмний амьдралыг харуулах чухал хэрэглэгдэхүүнд тооцогдох болж, дотоод гадаадын олон үзэсгэлэнд тавигдсан түүхтэй.
Хан Чэнли Хөлөнбуйрын малчин айлд Чингис хааны зурагтай ханын хивсний өмнө.
“Хан Чэнлигийн гэрэл зургийн бүтээлүүд” цомгийн хавтасны зураг.
Хөлөнбуйрт авсан бусад зураг.
Шотландын нэгэн хотын эмэгтэй чамин хувцасны дэлгүүрт өвөр монгол охины алдартай зургийг тавьсан байдал.
16 настай Бүтэдмаа аав, ээжийн хамт.
ТӨСТЭЙ МЭДЭЭ
Морин хуурын чуулга Истанбулд тоглоно
2025-01-17
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.