10 баримт: Тамаваши Б.Мөнх-Оргил
10 баримт
2024-11-15
Японы мэргэжлийн сүмо бөхөд 20 жил тасралтгүй барилдаж буй, дээд зиндааны хамгийн ахмад бөх Б.Мөнх-Оргил 40 нас хүрч байгааг тохиолдуулан түүний тухай 10 баримтыг хүргэж байна.
1. 39 насандаа мэргэжлийн сүмо бөхийн дээд зиндааны хамгийн ахмад бөх болсон Тамаваши Б.Мөнх-Оргил маргааш буюу 11 дүгээр сарын 16-нд 40 нас хүрэх гэж байна.
2. Анх зочид буудлын салбарт ажилладаг байсан тэрбээр Японд сурдаг төрсөн эгчийгээ эргэхээр Токиод очихдоо сүмогийн тэмцээн үзсэнээр Какүрюү М.Анандтай танилцан сүмод хөл тавьжээ. Улмаар 2004 оны нэгдүгээр сард мэргэжлийн сүмод анхны барилдаанаа хийсэн юм.
3. Түүнээс хойш өнөөг хүртэл 20 жил дараалан нэг ч башё, нэг ч барилдаан алгасалгүй барилдаж түүгээрээ Японы сүмо бөхийн түүхэн амжилтын эзэн болсон билээ. Б.Мөнх-Оргил өнгөрөгч есдүгээр сарын 10-нд 1631 дэх барилдаанаа хийснээр өмнө нь тасралтгүй 1630 удаа барилдаж 1986 онд зодог тайлсан япон бөх Аобажогийн амжилтыг шинэчилсэн юм. 2022 онд цар тахлын хөл хорионы улмаас барилдаан завсардсаныг нь тасалсанд тооцоогүй.
4. Ийнхүү олон жил гэмтэл бэртлээс ангид байж тасралтгүй барилдсан түүнийг япончууд тэцүжин буюу “төмөр хүн” гэж хочилдог бөгөөд олон ч дэмжигчтэй билээ.
5. Тэрбээр маргааш төрсөн өдрөөрөө 1651 дэх барилдаанаа хийнэ.
6. Дээд зиндаанд маэгаширагийн 11-д бичигдэж буй түүний авсан хамгийн дээд цол нь дээрээсээ гурав дахь том цол болох сэкивакэ бөгөөд 30 гарсан хойноо гол амжилтуудаа гаргасан юм. Тухайлбал, ёкозүна цолтой бөхчүүдийг дөрвөн удаа давж тусгай шагнал хүртсэн билээ.
7. Дээд зиндаанд хоёр удаа түрүүлсний эхнийх нь 2019 оны нэгдүгээр сар. Харин хоёр дахь удаагаа 2022 оны есдүгээр сард түрүүлсэн. Тухайн үед 37 нас, 10 сартай байсан Тамаваши мөн л сүмогийн нэгэн дээд амжилтыг эвдсэн нь 1958 оноос хойш дээд зиндаанд түрүүлсэн хамгийн өндөр настай бөх болсон нь юм.
8. 189 см өндөр, 178 кг жинтэй тэрбээр "Дели-1982" Азийн наадмын боксын хүрэл медальт Самбуугийн Хичээнгүйн (194.5 см өндөр) төрсөн эгчийн хүү ажээ.
9. Тэрбээр тэтгэвэрт гарсан хойноо дэвжээний багшаар үлдэх зорилготой байсан тул 2021 онд Японы иргэншил хүсэж энэ оны гуравдугаар сард албан ёсоор Японы иргэн болсноо зарласан. Тэрбээр Тамаваши Ичироо хэмээх дэвжээний нэрээрээ паспорт авсан байна.
10. Б.Мөнх-Оргил 2012 онд Тамашохо Э.Энхманлайн том эгчтэй гэрлэсэн бол түүний хоёр дахь хүүхэд 2019 оны нэгдүгээр сарын башёд түрүүлэх нь тодорхой болсон тэр өдөр мэндэлжээ.
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.