Сагсан бөмбөгийн тэмцээний 9000 тасалбарын 80 хувь нь 6 цагийн дотор борлов

Б.Бадамзул

Чихэнд чимэгтэй

2023-01-26

2025 оны Азийн аварга шалгаруулах сагсан бөмбөгийн тэмцээний нэгдүгээр шатны D хэсгийн тоглолт Улаанбаатарт 11 дүгээр сарын 10-14-ны хооронд болсон билээ. Тэгвэл 2 дугаар сарын 24-26-ны хооронд мөн “UG Arena”-д хоёрдугаар шатны тоглолтууд болохоор товлогдсон бөгөөд өчигдөр тоглолтын тасалбар худалдаанд гарсан юм. Тус спорт цогцолбор нь 3000 хүний суудалтай бөгөөд тасалбар борлуулж эхэлснээс зургаан цагийн дотор гурван өдрийн бүх тоглолтын суудлын захиалгын 80 хувь дүүрчээ. Мөн нэг цагийн дотор талбайн хажуугийн болон VIP суудлууд дүүрч, хоёр талын шийтний арын хойд эгнээний суудлууд үлджээ. Азийн аваргын хоёрдугаар шатанд Энэтхэгт болсон С хэсгийн тэмцээнээс шалгарсан Сингапур, Гуам, Хонконгийн багууд манай улсад болсон D хэсгийн тоглолтоос шалгарсан Монгол, Тайланд, Малайзын багууд нийлж F хэсэг болж өрсөлдөнө. Улмаар эхний гурван баг нь дараагийн шатанд шалгарах ёстой. Эдгээр багийн тоглолтоос Монгол, Хонконгийн хоорондох тоглолтыг үзэгчид илүүтэй сонирхож байна.