Япон: Ахлах сургууль төгсөгчдөд ажлын байр, өндөр цалин амлаж байна

Д.Бизьяа

Анд нөхдийн мэдээ

2025-09-17

   Ажиллах хүчний хомсдолтой тэмцэж буй Японы компаниуд ахлах сургууль төгсөгчдөд өндөр цалинтай, хөдөлмөрийн нөхцөл сайтай ажлын байр санал болгож байна. Тухайлбал нягтлан бодох бүртгэлийн системийн TKC компани ирэх онд ажилд авах бүх төгсөгчийн дээд сургуулийн сургалтын төлбөрийг олгох тогтолцоог нэвтрүүлэхээр болсон тухай “Nihon Keizai Shimbun” сонин мэдээлэв. Энэхүү систем нь ахлах сургуулийн төгсөгчдөд их, дээд сургууль төгсөгчидтэй адил ажил мэргэжлээр ажиллах боломжийг олгох зорилготой, мөн ахлах сургууль төгсөгчид ажилд ороод ажлынхаа тодорхой хэсгийг их сургуульд сурах явцдаа хийж болох ажээ. TKC-ийн хүний ​​нөөцийн менежер хэлэхдээ "Санхүүгийн асуудлаас болж их, дээд сургуульд суралцаж чаддаггүй чадварлаг залуусыг дэмжих, ажиллах хүчний хомсдлыг өөр аргаар шийдэх зорилготой” гэжээ. Төрөлт бага, хүн амын тоо буурч байгаа Япон улсын аж ахуйн нэгжүүд сүүлийн үед ажиллах хүчний хомсдолд орох болсон. Эрүүл мэнд, хөдөлмөр, нийгмийн хамгааллын яамны статистик мэдээллээр, ирэх хавар сургуулиа төгсөөд ажилтай болно гэж найдаж буй ахлах ангийн сурагчдын тоо долоодугаар сарын эцсийн байдлаар 126 мянга орчим байна. Зарим компани ахлах сургууль төгсөгчдийн гарааны цалинг нэмэгдүүлж, мэргэжлийн гэрчилгээ олгох, байр сууцаар хангах зэрэг олон төрлийн халамжийн хөнгөлөлтийг санал болгож байна. Тухайлбал хурдны замын автобусны үйлчилгээ эрхэлдэг “Willer Express” компани туршлага, наснаас үл хамааран эхний жилээс 6 сая иенийн цалин санал болгожээ. Цаашлаад Японы компаниудын 30 гаруй хувь нь 2026 онд шинээр ажилтан авах төлөвлөгөөндөө ахлах сургууль төгсөгчдийн тоог огцом нэмэгдүүлнэ гэдгээ мэдэгдэв. Энэ хандлага нь ялангуяа барилга, тээвэр, мэдээллийн технологи зэрэг ажиллах хүчний хомсдолд орсон салбаруудад идэвхтэй хэрэгжиж эхэлснийг хэвлэлүүд онцолжээ.