Дани, Гренланд хоёр нэгдэх үү?

Д.Бизьяа

Анд нөхдийн мэдээ

2025-04-04

Өнгөрсөн 3-ны өдөр Гренландад айлчилсан Данийн ерөнхий сайд Метте Фредериксен АНУ-ын ерөнхийлөгч Дональд Трампын бодлогын эсрэг байр сууриа хатуу илэрхийлэв. Тэрбээр Гренландын шинэ ерөнхий сайд Йенс-Фредерик Нильсен, ерөнхий сайд асан Муте Эгеде нартай хамт байлдааны хөлөг онгоцон дээр хэвлэлийн бага хурал хийлгэж, АНУ-ын явуулж буй бодлогыг шүүмжлэн "Энэ бол зөвхөн Гренланд эсвэл Дани улсын тухай асуудал биш. Атлантын далайг дамнасан дэлхийн дэг журамтай холбоотой юм асуудал юм" гэжээ. Мөн тэрбээр энэ өдөр Гренландын аюулгүй байдлыг хангах Арктикийн шинэ хөлөг онгоц, алсын тусгалын нисгэгчгүй онгоц, хиймэл дагуулын хүчин чадал зэргийг дурдаж, цаашид батлан хамгаалах салбарт Дани улс илүү их хөрөнгө оруулалт хийнэ гэдгийг онцолсон байна. Өнгөрсөн сарын 30-нд Д.Трамп хэвлэлд өгсөн ярилцлагадаа "Бид Гренландыг авна. Бүр 100 хувь. Хүч хэрэглэхгүйгээр ч үүнийг хийх боломжтой" гэж мэдэгдсэний хариуд Гренландын ерөнхий сайд Ф.Нилсен "Би тодорхой хэлье. АНУ Гренландыг авч чадахгүй” гэсэн билээ. Мөн тухайн өдрийн хэвлэлийн хурал дээр гаднын дарамт шахалт ирж буй энэ үед Дани, Гренланд хоёр нэгдэх нь зүйтэй гэсэн байр суурь илэрхийлсэн байна.