“Mongol TV”-ээр Өмнөд Солонгосыг сурталчилна
Өмнөд Солонгосын Соёл, спорт, аялал жуулчлалын яам улсынхаа соёлыг гадаадын иргэдэд сурталчлах зорилгоор “The Senses of K-Culture” хөтөлбөрийг энэ жил таван удаа зохион байгуулахаар болсноо өнөөдөр зарласныг korea.net сайт уламжлав. Хөтөлбөрийг Өмнөд Солонгосын олон улсын өргөн нэвтрүүлгийн сантай хамтран хэрэгжүүлэх бөгөөд тус улсад амьдардаг гадаад иргэдийг хүмүүсийн сайн мэддэггүй газруудаар аялуулж, тухайн газрын соёлыг таниулах зорилготой юм. Тэгвэл энэ хөтөлбөрт манай “Mongol TV” оролцож нэвтрүүлэг хийн Монголд гаргахаар болсон байна. Эхний хөтөлбөрийг энэ сарын 5-7-нд Гёнги-до аймгийн Гимпо хот, Инчеоны Ганхва-гун тойрогт хийж, хоёр Солонгосын хилийн зурвасаас Хойд Солонгосыг харах, солонгос хоол хийх зэрэг үйл ажиллагаа зохион байгуулахаар бэлджээ. Хоёр дахийг нь тавдугаар сарын 23-25-нд Ганвон-ду аймагт зохион байгуулж далайн хоол, далайн эргийн аяллыг сурталчлах юм байна. Мөн тавдугаар сарын 26-28-нд Гёнсанбуг-до аймгийн Гёнжу хот дахь эртний Шилла улсын түүхэн дурсгалт газруудаар оролцогчдыг аялуулах аж. Харин дөрөвдүгээр ээлжийн аяллыг ирэх есдүгээр сард Мужу-гун тойрогт хийх бөгөөд хөтөлбөрийн оролцогчид хүн орхоодойтой рашаанд орж, дарсны агуйд зочилно. Тав дахь аяллыг Чунчоннам-до аймгийн Гонжу, Пуёо-гун тойрогт хийх бөгөөд "Пэгжэ" соёлын наадамд оролцуулж, эртний Пэгжэ улсын соёлын дурсгалт газруудыг үзүүлэх гэнэ. Энэ хөтөлбөрт хамрагдах хүмүүсийн үзэж туулсныг бичлэг болгохоос гадна оролцогчид нь хувийн цахим хаягаараа мэдээлэл дамжуулж Өмнөд Солонгосын соёлыг сурталчлах ажээ. Улмаар бичлэгийг" Ариранг" телевиз болон түүний “Youtube” дэх сувгаар цацах юм байна.
ТӨСТЭЙ МЭДЭЭ
Дани, Гренланд хоёр нэгдэх үү?
2025-04-04
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.