Израиль: Эртний ховор эд олсон гурван настай охиныг "Хүндэт иргэн" тэмдгээр шагнав

Д.Бизьяа

Анд нөхдийн мэдээ

2025-04-03

Гурван настай израиль охин гэрийнхэнтэйгээ эртний дурсгалт газраар аялж яваад 3800 жилийн настай үнэт эд олжээ. “Jerusalem Post” сонины мэдээлснээр, аав ээжтэйгээ аялж явсан Зив Ничан охин Иерусалимын ойролцоох Тель Азекагийн балгасаас сонин хэлбэртэй чулуу олоод аав ээждээ үзүүлэхэд чулуу биш металл эд байсан тул Израилийн эртний олдворын газарт (IAA) хүргүүлжээ. Мэргэжлийн хүмүүс шинжилж үзэхэд тэр нь энэ нутагт амьдарч байсан эртний нэгэн үндэстний шүтээн сахиус байсан байна. Олдворыг хүрэл зэвсгийн үеийнх гэж үзэж байгаа бөгөөд Израилийн үндэсний археологийн хотхон дахь үзэсгэлэнд гаргаж, Зив охиныг "Хүндэт иргэн" тэмдгээр шагнасан байна. Эртний Египетээс үүсэлтэй ийм сахиус өмнө нь хуучны бунхан, барилга байгууламжаас маш цөөн олдож байсан гэнэ. Израилийн Соёлын сайд Амихаи Элияху хэлэхдээ "Шинэ олдвор нь биднийг олон мянган жилийн өмнө энэ газар нутагт амьдарч байсан эртний соёл иргэншлийн агуу түүхтэй холбож байна" гээд, үүнд бага насны хүүхэд онцгой хувь нэмэр оруулсныг бахархан тэмдэглэжээ.