Норвеги улс хөлбөмбөгийн шилдэг тамирчнаа өндгөөр шагнав

Д.Бизьяа

Анд нөхдийн мэдээ

2025-04-02

Норвегийн мэргэжлийн хөлбөмбөгийн баг шилдгээр шалгарсан тамирчиндаа цомын оронд өндөг өгсөн байна. BBC агентлагийн мэдээлснээр, тус улсын хөлбөмбөгийн "Bryne3 баг лигийн эхний тоглолтоо "Bodø/Glimt" багтай хийж 0:1 оноогоор хожигджээ. Гэсэн ч өрсөлдөгчийнхөө торгуулийн цохилтыг амжилттай хаасан хаалгач Ян де Бурыг шилдэг тамирчнаар шалгаруулсан байна. Харин шагналын тавцан дээр зогсох түүний гарт цом биш дөрвөн сагс өндөг байсан нь олны анхаарлыг татав. Энэ нь газар тариалан голлон эрхэлдэг тус нутгийн онцлогтой холбоотой бөгөөд эндхийн гол үйлдвэрлэл нь мах, сүү зэрэг хөдөө аж ахуйн бүтээгдэхүүн байдаг. Шагнал гардуулах үеэр багийн хөгжөөн дэмжигчид цэнгэлдэх хүрээлэн даяар “Бид тариачин гэдгээрээ бахархаж байна” хэмээн уухайлж байжээ. Шилдгээр шалгарсан тамирчинд нутгийн онцлогтой хүнс бэлэглэх нь иргэд болон спортын байгууллагын хамтын ажиллагааны нэг хэлбэр аж. Орон нутгийн захиргаа дараагийн шатны тэмцээний шилдэг тамирчинд сүү бэлэглэхээр болсон гэнэ. Энэ талаар BBC мэдээлэхдээ "Нэгэн цагт Премьер лигийн шилдэг тоглогчдод оргилуун дарс өгдөг заншилтай байгаад, улмаар цом гардуулдаг болсон. Харин одоо тахианы өндөг гардуулдаг болжээ” гэсэн байна.