Хятад: 18 настай охин юуны учир ариун цэврийн өрөөнд амьдрах болов?

Д.Бизьяа

Анд нөхдийн мэдээ

2025-04-01

   Хятадын Хунань мужийн Жужоу хотын тавилгын дэлгүүрт ажилладаг 18 настай Янь Мо хэмээх охин сайн дураараа компанийнхаа ариун цэврийн өрөөнд сар бүр 50 юань төлж амьдарч байгаа тухай Хонконгийн “South China Morning Post” сонин мэдээлэв. Түүний сарын цалин 2700 юань, байр түрээслэхэд доод тал нь 1800 юань болох тул тэрбээр ийм сонголт хийжээ. Тэрхүү ариун цэврийн өрөө нь 6 м/кв талбайтай, ажилчид тарсан хойно тэрбээр эвхдэг ор тавьж амарна. Өглөө нь ажилчид цуглахаас өмнө босож ор дэрээ хураан ажилдаа орно. Хөлсний хямд байр түрээслэн амьдарч болох ч ажлаас нь хэтэрхий хол, бас ганцаар амьдрахад аюулгүй байдлын талаасаа найдвартай биш гэж үзэн ингэж шийдсэн бөгөөд "Энэ өрөө цэвэрхэн, элдэв үнэргүй, 24 цагийн хяналтын системтэй тул надад хамаагүй дээр байна” гэжээ. Түүнийг нэг ой хүрмэгц аав, ээж хоёр нь ажилдаа шамдаж өвөө, эмээ дээр нь үлдээсэн бөгөөд охин 16 нас хүрээд бие даан амьдрахаар гэрээсээ явсан гэнэ. Сарын цалингаасаа 300-400 юань хадгалж, өөрийн гэсэн байртай болохоор ийнхүү мөнгөө хэмнэн аж төрж байгаагаа тэрбээр “South China Morning Post” сонинд ярьсан байна. Энэ мэдээ олон нийтийн мэдээллийн хэрэгслээр маш хурдан тарж, Янь цахим сүлжээнд 15 мянга гаруй дагагчтай болжээ. Цахим хэрэглэгчид энэ хэрсүү охиныг магтан урам хайрлаж “Чи тун удахгүй зорьсондоо хүрнэ. Битгий шантраарай” гэх мэт эерэг сэтгэгдэл үлдээсэн байна.