106 настай эмэгтэй агаарын тээврийн компанид юуны учир гомдол гаргав?

Д.Бизьяа

Анд нөхдийн мэдээ

2025-04-01

Нисэх онгоцны буудлын систем насыг нь зөв таньдаггүйгээс болж онгоцонд суух бүрд төвөг учруулж байна хэмээн АНУ-ын иргэн 106 настай эмэгтэй гомдол гаргажээ. “Fox News” агентлагийн мэдээлснээр Техас мужид амьдардаг, Кретора Биггерстафф хэмээх тэр эмэгтэй жилд хоёр удаа Флорида руу нисдэг аж. Харин тэр болгонд нисэх буудлын шалган нэвтрүүлэх цэгүүдэд иргэний үнэмлэх дээрх регистрийн дугаарыг нь дахин дахин лавлах, насыг нь давтан асуух зэргээр төвөг учруулж, бусад зорчигчдоос илүү удаан саатуулдаг ажээ. Нисэх буудлын хяналтын систем 100-гаас дээш насны хүмүүсийн бичиг баримтыг таньж уншихгүй байгаад тэрбээр ийнхүү бухимдаж эрх баригчид болон агаарын тээврийн компаниудад гомдол гаргасан бөгөөд “Зуун настан гэхээр л тэргэнцэрт сууж, шүлсээ савируулан хүнээр асруулж явах ёстой гэж боддог бололтой. Би охинтойгоо жил бүр Флорида руу аялдаг, сугалаанд мөнгө хожвол Итали руу аялна" гэжээ. Тэрбээр гомдолдоо нисэх буудлын хяналтын системийг шинэчлэхийг шаардаад "Хүмүүсийн дундаж наслалт нэмэгдэж байгаа энэ үед 120 наслах бол энүүхэнд” гэсэн байна. Улмаар энэ хүсэлтээ АНУ-ын Тээврийн яам болон “United Airlines”, “Delta Airlines” компанийн гүйцэтгэх захирлуудад цахим шуудангаар илгээжээ.