У.Хүрэлсүх Японы эзэн хаанд бараалхаж, хамтдаа тоглолт үзэв

Ж.Ариунгэрэл

Чихэнд чимэгтэй

2022-12-01

Япон улсад айлчилж буй Монгол улсын Ерөнхийлөгч У.Хүрэлсүх, гэргий Л.Болорцэцэгийн хамтаар өчигдөр Япон улсын Цог жавхлант эзэн хаан Нарүхито, Эрхэм дээд хатан Масако нарт бараалхлаа. Эзэн хаан Нарүхито хоёр улсын хооронд дипломат харилцаа тогтоосны 50 жилийн түүхэн ой энэ жил тохиож, хоёр орны ард түмний найрамдал, нөхөрлөл улам батжин бэхжиж байгааг тэмдэглээд Монгол улсын Ерөнхийлөгчийн айлчлалд амжилт хүссэн байна. Нарүхито 2007 онд Угсаа залгамжлах хунтайжийн хувиар Монгол Улсад айлчлах үеэрээ монгол хаадын өлгий нутаг болох Хархоринд зочилсон болон Монгол улсын филармонийн уран бүтээлчидтэй хамтран хийл тоглосон дурсамжаа хуваалцжээ. Бараалхсны дараа У.Хүрэлсүх, гэргийн хамт эзэн хаан Нарүхито, хатан Масако нарыг хүндэтгэн, Токио хотноо зохион байгуулж буй Монгол улсын филармонийн дэргэдэх “Морин хуур” чуулгын тоглолтыг хамтдаа үзэж сонирхов.