10 баримт: Трампын мөнгө

Ж.Ариунгэрэл

10 баримт

2024-11-07

АНУ-ын ерөнхийлөгчийн сонгуульд Дональд Трамп ялав. Тэрбээр тус улсын 45 дахь ерөнхийлөгчөөс гадна алдартай бизнесмэн, тэрбумтан билээ. Түүний тэрбумын хөрөнгөний талаарх 10 баримтыг уншигчдадаа толилуулж байна.    

1. Дональд Трампын эцэг Фрэд Трамп дунд сургуулиа төгсөөд 1924 онд эхээсээ 800 доллар зээлэн анхныхаа байшинг барьж борлуулснаар эдний гэр бүлийн барилга, үл хөдлөх хөрөнгийн бизнес эхэлсэн байна. Ф.Трамп 35 нас хүрэх үедээ Нью-Йоркийн Брүклин, Куинс дүүргүүдэд жилдээ хэдэн зуун байшин барьдаг болов. 45 настайдаа АНУ-ын хамгийн том орон сууцны цогцолборуудыг барьдаг болжээ. “Brooklyn Daily Eagle” сонин түүнийг “Барилгын салбарын Хэнри Форд” хэмээн бичиж байв. 

2. Трамп гурван настайгаасаа эхлэн аавынхаа бизнесээс жилдээ одоогийн ханшаар 200 мянган долларын хөрөнгө хүртэж эхэлжээ. “The New York Times” сонинд бичсэнээр Д.Трамп “... найман настайдаа саятан болсон”. Учир нь түүний эцэг, эмээ хоёрын барилга, үл хөдлөх хөрөнгийн бизнес, 1949 онд байгуулж эхэлсэн хөрөнгө оруулалтын итгэмжлэгдсэн сангуудын ашгаас түүнд ноогдох хувь 1954 он гэхэд ийм хэмжээнд хүрчээ.

3. 17 настай байхад нь эцэг нь түүнд 52 өрөөтэй байшингийнхаа нэлээд хэсгийг эзэмшүүлэв. Дунд сургуулиа төгссөнөөсөө эхлэн тэрбээр эцгээсээ жил бүр нэг сая доллар авч байжээ. Энэ мөнгө жил бүр өссөөр Дональдыг 40 нас хүрэхэд доод тал нь 5 сая доллар болжээ. 

4. АНУ-ын тэргүүн баячуудын “Forbes 400” жагсаалтад тэрбээр эцгийн хамтаар анх 1982 онд буюу 36 настайдаа орж ирсэн бөгөөд эцэг, хүү хоёрын хөрөнгө тухайн үед 200 сая доллар байв. Ф.Трамп 1999 онд нас барахдаа хүүдээ өнөөдрийн ханшаар 500 сая долларын хөрөнгийг бэлэглэлийн журмаар болон бусад хэлбэрээр шилжүүлжээ.

5. “The New York Times” сонин Фрэд Трампын бизнесийн татварын болон санхүүгийн 100 мянган хуудас баримт бичиг, хуучин зөвлөх болон янз бүрийн түвшний ажилтнуудтай нь хийсэн ярилцлагын үр дүнд хүүхдүүддээ хөрөнгөө шилжүүлэх 295 өөр өөр суваг бий болгосныг тогтоож байв.

6. Д.Трамп олон тооны барилга, зочид буудал, казино, гольфын талбай, хувийн “Боинг 757” онгоц, хувьцаа эзэмшихийн зэрэгцээ бизнесийн олон төрлийн орлоготой бөгөөд “Trump” брэндийн зангиа, үхрийн мах, шээсний шинжилгээний багц, аминдэм, хүнсний нэмэлт, ресторан, видео тоглоом, хэвлэл мэдээлэл, усан үзмийн дарс, цагаан архи зэрэг олон арван бүтээгдэхүүнийг зах зээлд нийлүүлж ирсэн бөгөөд тэдгээрийн дийлэнхийг одоо ч борлуулсаар байна.        

7. 1997 онд Д.Трамп Нью-Йоркийн Бронкс дүүргийн дунд сургуульд зочлоход сургуулийн шатрын багийнхан УАШТ-д явах замын зардал хүсчээ. Д.Трамп тэдэнд нэг сая долларын чек өгсөн нь хуурамч байв. Сүүлд тэрбээр хүүхдүүдэд 200 доллар шилжүүлжээ.

8. 1970-аад оноос хойш 2016 онд ерөнхийлөгчөөр сонгогдох хүртэлх хугацаанд Д.Трамп болон түүний бизнесийн бүтцүүд АНУ-ын Холбооны болон бусад шатны шүүхэд очсон 4000 гаруй хэрэг маргаанд янз бүрийн байдлаар оролцжээ. Зөвхөн татварын маргаан гэхэд 100 давсан бөгөөд хамгийн сүүлд энэ оны хоёрдугаар сард Нью-Йоркийн шүүх түүнийг татвараас зайлсхийхийн тулд хөрөнгөө дарж мэдүүлсэн хэрэгт буруутай хэмээн үзэж 454.2 сая доллар төлүүлэх шийдвэр гаргасан юм. 

9. Д.Трамп өөрийн санаачилж, продюсер, хөтлөгчөөр нь ажилласан телевизийн “The Apprentice” шоунаас 2008-2014 онд нийтдээ 427.4 сая долларын орлого олжээ.

10. “Forbes” сэтгүүлийнхээр Д.Трампын хөрөнгө өнөөдрийн байдлаар 6.6 тэрбум доллар бөгөөд дэлхийн баячуудын жагсаалтад тэрбээр 549-т байна.  

Гэрэл зургийн эх сурвалж: bloomberg.com