Улаан-Үд: 365 ширхэг буузны шагналтай уралдаан зарлав

Ж.Ариунгэрэл

Анд нөхдийн мэдээ

2024-01-23

ОХУ-ын Буриад улсын нийслэл Улаан-Үд хотын ус хангамжийн “Водоканал” УҮГ Цагаан сарын баярыг угтаж хэрэглэгчдэдээ зориулан “Аз хийморийн Цагаан сар” уралдаант хөтөлбөрийг зохион байгуулж байна. Өчигдөр эхэлсэн энэхүү урамшуулалт хөтөлбөрт оролцохын тулд ус хэрэглэгч иргэд, аж ахуйн нэгжүүд гар утасны “Водоканал Улан-Удэ” аппликэйшнийг ашиглан хүйтэн усны хэрэглээнийхээ ирэх сарын төлбөрийг урьдчилан төлөх аж. Ингэхдээ өмнөх хугацааны усны төлбөрийн өргүй, төлбөр төлөх хугацаа сунгасны торгуульгүй байх ёстой. Улмаар хөтөлбөрийн ялагчийг санамсаргүй түүврийн аргаар тодруулах бөгөөд нэг жилийн хэрэглээний буузаар урамшуулна. Ингэхдээ нэг өдрийн нэг буузаар бодож нийт 365 ширхэг бууз олгох ажээ. Хөтөлбөр нэг сарын дараа буюу хоёрдугаар сарын 22-нд өндөрлөж ялагчийг тодруулна хэмээн “Буряад үнэн” сонин өчигдрийн дугаартаа мэдээлсэн байна.