Зайсангийн хуучин гүүрийг буулгаж, шинэ гүүрний шонгийн суурийг өрөмдөж эхэлжээ

Duuren.Life

Миний сайхан улаанбаатар

2025-03-07

Өнгөрөгч нэгдүгээр сарын 10-нд эхэлсэн Зайсангийн хуучин гүүрийг буулгах ажил дуусч, шинээр барих гүүрний шон, суурь цутгах ажил эхэлжээ. Мөн арматур бэлтгэх, дам нурууг зөөн авчрах ажил ид өрнөж байгаа бөгөөд гүүрэнд орох 50 дам нуруунаас өнөөдрийн байдлаар 26 дам нурууг зөөвөрлөн авчраад байна. Төслийн гүйцэтгэгч “ЗМЗ” ХХК-ийн гүүрийн инженер Ш.Тэмүүлэнгийн хэлснээр өдөрт хоёр дам нурууг буулгаж байгаа аж. Тэгвэл нийт 70 ширхэг шон суурилуулахаас өнөөдрийн байдлаар 26 шонгийн суурийг өрөмдөөд байна. Гүүрийн шонг газрын түвшнээс доош 17 метрийн гүнд суурилуулна. Өдөрт мөн хоёр суурь өрөмдсөнөөр энэ ажил дөрөвдүгээр сарын эхээр дуусах бөгөөд гүүрийг ирэх зургадугаар сард нээхээр төлөвлөн ажиллаж байна. 1968 онд ашиглалтад орсон Зайсангийн хуучин гүүрэнд 57 жилийн турш нэг ч удаа засвар, шинэчлэл хийгээгүй бөгөөд 2012 онд ашиглалтын түвшин D үнэлгээнээс бага буюу хэзээ ч нурж магадгүй гэсэн дүгнэлт гарсан юм. Иймээс уг гүүрийг 225 метр, дөрвөн эгнээ бүхий төмөрбетон хос гүүрээр шинэчлэх төслийг 2022 онд эхлүүлсэн. Улмаар баруун гүүрийг шинээр барьж 2023 оны есдүгээр сард ашиглалтад оруулсан билээ. Төслийн нийт төсөвт өртөг нь 26 тэрбум төгрөг юм.