Манжийн үеийн Халхын өртөөний нэгэн зураг
Манжийн ноёрхлын үеийн Халхын өртөөний зургийг энэ үеийн туршид буюу тухай тухайн цаг үедээ маш олон янзаар үйлдсэн нь эдүгээ гадаад, дотоодын архивт бий. Тэдгээрийн нэг, Халхын 27 өртөөг тэмдэглэсэн нэгэн зургийг сонирхуулж байна. Он тодорхойгүй энэ зурагт Улиастай хотоос эхлэн Их хүрээ хүртэлх 27 өртөөг тэмдэглээд өртөө бүрийн байршлыг газрын нэртэй нь, мөн тэдгээр өртөө аль ноёны нутагт хамаарахыг тэмдэглэжээ. Тухайлбал нэгдүгээр өртөөг Бумбат, хоёрдугаарыг Шургахын улаан үзүүр, улмаар хорин долоо дахь өртөөг Шар хөв гэхчлэн заасан бол хамаарах нутгийг “Энэ гуравдугаар өртөөнөөс наймдугаар өртөө хүртэл цөм засаг Жамсрангийн нутаг”, “Энэ арван есдүгээр өртөөнөөс хорин дөрөвдүгээр хүртэл цөм гүн Сономцэрэнгийн” гэхчлэн тэмдэглэсэн байна. Зургийн зүүн доод булан, дунд хэсэг, баруун дээд буланд улаан өнгийн дугуй тамга даржээ. Улиастайгаас эхлээд Өрмийн цагаан нуур (одоогийн Булган аймгийн Сайхан, Орхон сум) Өвөрдулаан (одоогийн Төв аймгийн Баянцогт сум) гэх зэрэг өдгөө бидний мэдэх газрыг заасан байдлаас харахад өртөөг тэмдэглэсэн цувраа дугуй тэмдэг нь өртөөний байрлал, хоорондын чиглэлийг тойм төдий боловч харуулж байна. Газрын зургийг үйлдсэн он тодорхойгүй боловч зохиогчийн бичихзүйн зарим онцлог, тухайлбал, үгийн эхний ш, үгийн эцсийн г зэрэгт дусал хэрэглэсэн байдлыг харахад энэ нь 1800-гаад оны дунд буюу, түүнээс өмнөх үеийн зураг байж болох юм.
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.